Nico Rosberg apo Lewis Hamilton, cili do të jetë kampioni i Formula 1 për vitin 2016? Sikurse ka ndodhur gjatë dy viteve të fundit, emri i fituesit do të mësohet në Çmimin e Madh të Abu Dhabit, i fundit për këtë sezon. Nëse Rosberg renditet në një nga tre vendet e para, është automatikisht kampion, por ekzistojnë shumë skenarë të tjerë, që mund të favorizojnë Hamilton. Me të drejte vëmendja është e fokusuar te dyshja e Mercedesit, por gara e Abu Dhabit ofron duele të tjera që meritojnë të analizohen.
Sebastian Vettel i Ferrarit dhe Max Verstappen i Red Bullit, përkatësisht me vendin e katërt dhe të pestë, ndahen me vetëm 5 pikë nga njëri-tjetri. Dueli mes tyre po shoqërohet me tension konstant që kur holandezi iu bashkua Red Bullit dhe u ngjit për herë të parë në shkallën më të lartë të podiumit në çmimin e madh të Spanjës. Edhe pse Verstappen në katër çmimet e para të mëdha garoi për Toro Rosson, diferenca mes tyre është e ngushtë, 197 me 192 pikë.
Pika kulminante e përplasjes mes tyre u shënua në Çmimin e Meksikës, ku nuk munguan madje edhe ofendimet mes tyre. Verstappen shihet edhe si një bombë me sahat për Mecedesin, pasi me çmenduritë e tij mund të vendosë çështjen e titullit duke nxjerrë jashtë gare një nga pilotet e skuadrës gjermane. Temperamenti i holandezit e ka detyruar shefin e Mercedesit Toto Wolf t’i telefonojë babait të tij, të cilit i ka kërkuar që t’i tërheqë vëmendjen të birit që të mos bëjë ndonjë marrëzi.
Cili do të jetë spanjolli më i miri i këtij viti në Formula Alonso apo Sainz? Piloti i McLarenit ka 53 pikë, 7 me shumë se bashkëkombësi i tij i Toro Rossos, por mund të shkëmbejnë vendet në varësi të rezultateve të garës së Abu Dhabit.
Skudra Sauber dhe Manor, do të duelojnë për të shmangur vendin e fundit për konstruktorë, pasi kanë grumbulluar respektivisht 2 dhe 1 pikë.
Në çmimin e madh të vitit do t’i thonë lamtumire Formules 1 dy pilotet veterane, Jenson Button dhe Felipe Massa. Për kampionin e botës në vitin 2009, kjo do të jetë gara e 305-të në kategorinë më të lartë të automobilizmit, ndërsa braziliani zbret për herë të 250-të në pistë për një çmim të madh në Formula 1.
