Seanca plenare sot në Kuvendin e Shqipërisë nisi me fjalën e kryetarit Gramoz Ruçi lidhur me tërmetin e një viti më parë.
Ai vlerësoi solidaritetin e shqiptarëve dhe kontributin që dhanë shtetet e tjera të BE-së në konferencën e donatorëve.
“Qindra mijëra qytetarë kontribuan me sa mundën për të lehtësuar barrën e përballimit të pasojave të tërmetit. Sfida e qytetarëve po mund sfidën e natyrës. Përgjigjja e Qeverisë e institucioneve edhe solidariteti i qytetarëve shqiptarë inspiruan mbështetjen e fuqishme ndërkombëtare. Konferenca e donatorëve e shkurtit 2020, me moton “Bashkë për Shqipërinë”, mobilizoi për rindërtimin një ndihmë jashtë çdo parashikimi: 1.15 miliardë Euro, prej të cilave 300 milionë dhuratë”, tha Ruçi
Ai inkurajoi qeverinë për realizimin e objektivave të rindërtimit për rikthimin e qytetarëve në shtëpitë e tyre.
“Përpjekjet tona për rikthimin e qytetarëve në shtëpitë e tyre të rindërtuara apo të reja, nuk u ndalën, nga pandemia e Covid-19, e cila shpërtheu në kulmin e rindërtimit. Kuvendi inkurajon punën e Qeverisë për realizimin e objektivave të rindërtimit edhe në kushtet e kostove që imponoi pandemia. Fuqia, shpresa dhe besimi janë më të mëdha se goditja e tërmetit e ankthi prej pandemisë.Solidariteti e dashuria njerëzore prodhojnë rezultate më të mira se ndarja e konfliktet”, shtoi kryeparlamentari.
Në fund të fjalës së tij, Ruçi kërkoi nga deputetët të mbanin një minutë heshtje në nder të viktimave të tërmetit. /Opinion.al
