Borusia e Dortmundit duket të jetë në momentin më të mirë sezonal. Pasi ka mposhtur të shtunën në Bundesligë bavarezët e Bajernit të Mynihut, ka arritur një fitore rekordesh në Champions League.
Në mesin e shtatorit, Legia pësonte gjashtë gola në kryeqytetin polak nga gjermanët e Borusias. Por këtë herë shkon akoma më keq. Ndjekësit e futbollit në “Signal Iduna Park” kanë parë një lumë golash, teksa Borusia e Dortmundit ka fituar 8-4 ndaj Legias së Varshavës.
Në vitin 2003 qe regjistruar një rezultat i ngjashëm, kur Monako mposhtte 8-3 Deportivo la Korunjën, veçse mbrëmë janë shënuar 12 gola.
Kagaëa shënoi dy gola në 76 sekonda, duke arritur rekordin si dygolëshi më i shpejtë në historinë e aktivitetit. Ndërkaq, kjo ishte hera e parë në Champions League që tetë lojtarë të ndryshëm shënojnë në një ndeshje.
Borusia e Dortmundit e kishte arritur kualifikimin në grupin F para goleadës ndaj Legias, ndërsa asaj iu bashkua dhe Reali i Madridit, që fitoi 1-2 ndaj Sportingut të Lisbonës.
Eliminimi i Totenhemit në grupin E është një ndër befasitë e fazës në grupe të Champions League-s. Hugo Lloris, portieri francez i anglezëve, bëri ç’mundi për të dalë me rezultat pozitiv nga fusha e Monakos. Ai e bëri të pavlefshëm dhe një 11-metërsh të kundërshtarit, por nuk e shmangu humbjen 2-1.
Në të njëjtin grup, Bajer Leverkuseni siguroi kualifikimin pas një barazimi 1-1 në transfertën ndaj CSKA-së së Moskës.
Lestër Siti po bën një paraqitje mjerane në kampionatin anglez, krejt ndryshe nga ajo në Champions League. Fitorja 2-1 ndaj Bryzhit vulos kualifikimin në grupin G; kampionët e Anglisë kanë pësuar golin e parë në ndeshjet në grupe!
Nuk pati gola në përballjen Kopenhagen – Porto, në të njëjtin grup, duke e lënë çështjen e kualifikimit për në javën e fundit. Kjo ishte dhe ndeshja e vetme ku rezultati mbeti i pandryshuar nga fillimi në fund të lojës.
Në grupin H, Juventusi e siguroi kualifikimin me një fitore 1-3 ndaj Seviljes. Lioni u kthye me një trepikësh nga Zagrebi, pasi mundi ngushtësisht, 0-1, Dinamon.
Borusia e Dortmundit është skuadra që ka shënuar më shumë gola në pesë javët e fazës në grupe të Champions League-s, plot 19; rekordi negativ u përket Bryzhit dhe Dinamos së Zagrebit, që janë skuadrat e vetme pa asnjë pikë. Madje ekipi kroat është i vetmi që nuk ka shënuar ende një gol.
