Pushtimi rus i Ukrainës ka shkaktuar frikë në shumicën e shteteve fqinje të saj – nga shtetet baltike deri në Moldavi.
BBC shkruan se Finlanda teorikisht duhet të jetë e sigurt, pasi historikisht ka qenë neutrale. Ashtu si vendet e tjera skandinave, përveç Suedisë, në Finlandë nuk ka pasur mbështetje për t’u bashkuar me aleancën ushtarake të NATO-s.
Por kur zëdhënësja e ministrisë së jashtme ruse kohët e fundit paralajmëroi Finlandën dhe Suedinë në mënyrë eksplicite se çdo lëvizje drejt NATO-s mund të kishte pasoja ushtarake, njerëzit në të dy vendet u tronditën thellësisht.
Që atëherë, avionët luftarakë rusë kanë hyrë në mënyrë të hapur në hapësirën ajrore suedeze.
Nëse të qenit neutral nuk mjafton për t’u mbrojtur kundër Rusisë, njerëzit këtu thonë se ndoshta bashkimi me NATO-n do t’u japë dy vendeve mbrojtjen që u nevojitet.
Kjo paraqet një ndryshim të madh të qëndrimeve. Në Finlandë, veçanërisht, marrëdhëniet me Rusinë mendoheshin të ishin mjaft të mira, por pushtimi i Ukrainës ka ndryshuar gjithçka./Opinion.al
