Kjo fotografi e Yaneidi Guzman shpjegon më së miri situatën e rëndë që po kalon Venezuela. 38-vjeçarja ka pozuar për “Reuters” në shtëpinë e saj në Caracas. Ajo thotë se ka humbur rreth një të tretën e peshës së saj trupore në tre vitet e fundit, që prej nisjes së rrënimit ekonomik të Venezuelës.
Megjithëse është ndër vendet me resurset më të mëdha të naftës, Venezuela për shkak të politikave të Hugo Chavesit e më pas të pasardhësit të tij Nicolas Maduro po përballet me një inflacion rekord prej 80,000%. Kjo ka bërë që ushqimet të jenë një luks për një pjesë të vogël të popullsisë, në raftet e supermarketeve që dita-ditës kanë më pak produkte.
“Nuk dua të jem e pasur, por dua thjesht t’u jap fëmijëve të mi për të ngrënë. Dua t’u siguroj të ardhmen dhe të t’i çoj te mjeku kur sëmuren”, ka thënë Guzman për Reuters.
Aktualisht Venezuela po shkon drejt një konflikti civil. Lideri i opozitës Juan Guaido është vetëshpallur president dhe është njohur nga Bashkimi Europian dhe Shtetet e Bashkuara të Amerikës, ndërsa presidenti aktual Nicolas Maduro nuk pranon të largohet. Së fundi është mbyllur kufiri me Brazilin dhe Kolumbinë, ndërsa në shumë qytete kanë shpërthyer protestat./Opinion.al
