Këtë të dielë në kryeqytet pritet të zhvillohet Maratona e Tiranës me edicionnin e saj të 5-të.
Në një intervistë për mediat Gentian Vocaj përgjegjës për çështjet e qarkullimit në Bashkinë Tiranë, tregoi akseset që do të bllokohen të dielën që do të zhvillohet maratona dhe të jetë dita pa makina.
“Kjo maratonë ka një veçanti sepse për herë të parë është 42 km do të bëhet një maratonë e plotë dhe si e tillë ka disa shtesa në rrugët që do të kalojë maratona. Këto rrugë kryesisht janë në zemrën e kryeqytetit sic është rruga e Kavajës , rruga Myslym Shyri, Bulevardi Gjergj Fishta apo Bulevardi Bajram Curri, që të gjithë e dinë që këto janë rrugë që kanë një trafik të shtuar të këmbësorëve edhe të mjeteve” tha ai.
Ndër të tjera Vocaj tregon se të dielën do të ketë sinjalistike rrugore provizore për të orientuar drejtuesit e mjeteve.
“Të gjithë qytetarët që kanë mjetet e parkuara në këto rrugë këto ditë të shohin sinjalistikën rrugore që do të vendoset nga Bashkia e Tiranës, do vendoset sinjalistikë provizore prandaj qytetarët duhet të lëvizin mjetet një ditë para maratonës. Gara do të fillojë në Sheshin Skënderbej në orën 09:00 dhe bllokimi i qarkullimit do të fillojë një orë më parë, me përjshtime të vogla” përfundoi ai./Opinion.al
