Takim urgjent i Këshillit të Sigurimit të OKB-së. Kjo ka qenë kërkesa e Iranit, duke kërkuar të dënojë sulmet e SHBA-së ndaj objekteve të tij bërthamore.
Ambasadori i Iranit në OKB, Amir Saeid Iravani e quajti sulmin e SHBA-së një “kërcënim të rëndë kundër paqes dhe sigurisë rajonale dhe ndërkombëtare”.
Konkretisht në letrën e tij për Këshillin e Sigurimit, ai konfirmoi detajet e sulmit, i cili shënjestroi centralet bërthamore Fordow, Natanz dhe Isfahan në orët e para të mëngjesit të së dielës.
Ai gjithashtu pretendoi se sulmet ishin “nën mbikëqyrjen e plotë të Agjencisë Ndërkombëtare të Energjisë Atomike”, organit mbikëqyrës bërthamor të OKB-së. Ai nuk dha prova për këtë pretendim. Irani ka qenë gjithnjë e më kritik ndaj IAEA-s që nga shpërthimi i konfliktit me Izraelin.
Sulmet shkelin kartën e OKB-së dhe Traktatin ndërkombëtar për Mospërhapjen e Armëve Bërthamore, shtoi ai në letër, duke kërkuar një takim urgjent “për të shqyrtuar këtë akt të paligjshëm, për të miratuar masat e nevojshme për ta dënuar atë dhe për të siguruar që ata që janë përgjegjës nuk do të lihen pa u ndëshkuar”.
