Si asnjëherë më parë të gjithë pedagogët e Universitetit të Tiranës pritet të mblidhen në një Asamble. Ky takim i gjere dhe i hapur për të gjithë është thirrur pas situatës së krijuar së fundmi në fakultete. Protesta e studentëve bëri që qeveria të hartojë disa VKM, që sipas pedagoëve bien ndesh me autonominë e universiteteve.
Deri më tani janë mbledhur asambletë e fakulteteve tek Filologjiku, Shkencat e Natyrës dhe Shkencat Sociale, të cilat kanë qenë pro protestës së studentëve. Por tashmë organizatorët synojnë të dalin me një zë të përbashkët dhe ftojne pedagoge nga te gjitha degët e UT-së.
Takimi është planifikuar të zhvillohet ditën e premte, ora 10:00 në sallën e madhe të godinës LIRIA.
“Të premten, datë 25 janar 2019, në ora 10.00, në sallën e madhe të godinës LIRIA, mbahet takimi i parë i përgjithshëm mes asambleve të fakulteteve të Universitetit të Tiranës. Ky takim i përgjigjet situatës së krijuar në arsimin e lartë dhe propozimit të mbledhjeve të deritanishme të asambleve për takim mes asamblesh. Synimi është të dilet me një zë të përbashkët për Universitetin e Tiranës, në raport me situatën e krijuar dhe hapat në vazhdim. Ftohen të gjithë pedagogët e UT të marrin pjesë. Pjesëmarrja individuale e çdo pedagogu është vendimtare për të ardhmen e UT”, thuhet në deklaratën e grupit organizator.
/Ri-De
