9% e të dënuarve janë të sëmurë, por edhe me probleme të shëndetit mendor. Në qendrën spitalore të burgjeve ndodhen 32 gra dhe 430 të tjerë të akomoduar në burgun e Shënkollit në Lezhë. Këta të burgosur duhet të ishin nën administrimin e Ministrisë së Shëndetësisë.
Psikiatrja Artiola Hoxha, e ftuar në “Opinion” në Tv Klan thotë se bëhet fjalë për një mbipopullim sepse dhomat janë në përmasa 4×4 dhe mbajnë 10 pacientë. Një pjesë e pacientëve nuk kanë kryer vepra të rënda penale.
Artiola Hoxha: Praktikisht vijnë me vendim gjykate në momentin që kalojnë në IML dhe nëpërmjet IML-së, në varësi të veprës penale që kanë bërë…
Blendi Fevziu: Vijnë pasi janë ekzaminuar dhe nga ana shëndetësore?
Artiola Hoxha: Një pjesë e tyre kanë qenë të ekzaminuar.
Blendi Fevziu: Ah, kanë qenë para se të kryenin krimin.
Artiola Hoxha: Nga QSUT apo nga spitalet rajonale, më vonë në momentin që shkojnë në polici, merret vesh që është pacient psikiatrik dhe i jepet si dokument gjykatës. Gjykata më vonë thërret IML-në dhe shikon gjendjen e pacientit nëse realisht kjo vepër është kryer në bazë të problemit që ka. Ose e kalon në mjekim ambulator, vjen për shtrim të përkohshëm ose me mjekim të detyruar.
Erinda Ballanca: Për ta shpjeguar, jo të gjithë personat janë njerëz që kanë bërë krime të rënda.
Artiola Hoxha: Nëse flasim për mbipopullim që realisht kemi të bëjmë me mbipopullim se dhomat janë 4 me 4 kur janë 10 pacientë brenda. Ajo që ngelet për ndihmë janë rastet kur familjet marrin për dhunë në familje që mund të jetë një agravim momenti.
Blendi Fevziu: Për dhunë në familje janë në burg, tani dhuna në familje është problem.
Erinda Ballanca: Janë personat të cilët kanë probleme të shëndetit mendor dhe për shkak se nuk kurohen dhe nuk mjekohen, agravojnë. Ka një numër shumë të madh prej tyre që bëjnë edhe vepra të cilat janë të vogla krahasimisht për nga rrezikshmëria shoqërore, por ama familja pretendon dhe thotë që të shkojmë në një institucion që të marrë mjekimin dhe kështu duhet të jetë. Shqipëria fatkeqësisht nuk ka, duhet të ketë një institut të posaçëm mjekësor për ta trajtuar këtë çështje dhe ne nuk e kemi. I ka ngelur sistemit të burgjeve që është një nga gjërat më të tmerrshme që mund të ndodhë. Megjithatë aktualisht situata është shumë e mirë krahasimisht se më përpara. Përpara vitit 2021 ata ishin në një institucion me kushte disafish më të këqija që ishte i Zaharisë ku realisht atje situata edhe infrastrukturore ishte tmerrësisht më e keqe. Kapaciteti aktual në Shënkoll është më shumë se dyfishi i kapacitetit që ata duhet të kenë./tvklan
