Kreu i grupit parlamentar të Partisë Socialiste, Taulant Balla, i është ritkthyer cështjes Zagani, ish- shefit të antidrogës një prej njerëzve që më së pari ka artikuluar akuza për lidhje të ish-ministrit Saimir Tahiri me Habilajt dhe trafikun e drogës.
Balla e ka cilësuar Bashën gënjeshtar, ndërsa shkruan se Zagani, heroi mediatik i opozitës ka qenë në fakt i dënuar me vendim të formës së prerë. Postimin e tij Balla e shoqëron edhe me faksimile të dënimit të Zaganit.
Statusi i Ballës
E ftoj miqësisht Lulzim Bashën dhe Partinë Demokratike të heqë dorë nga heroi i tyre mediatik Dritan Zagani.
Nuk mundet që partia kryesore e opozitës të ketë hero një të dënuar me Vendim të formës së prerë “Në emër të Republikës” me 3 vite burgim.
Shikojeni vendimin!
Nuk pres që Lulzimi Basha dhe as PD të kërkojë ndjesë. Sepse siç thashë në mëngjes, të gënjejë është e vetmja punë që Lulzim Basha di të bëjë më mirë.
Por të betohesh për drejtësi mbi fjalët e një personi të arrestuar nga Gjykata e Krimeve të Rënda, bazuar në kërkesën e Prokurorisë së Krimeve të Rënda që në hetimin e saj ka konstatuar krimin e dekonspirimit (për llogari të një grupi trafikantësh) të një operacioni antitrafik të Policisë së Shtetit dhe më pas i dënuar nga Gjykata për largim nga vendi i qëndrimit të detyruar, kjo nuk është vetëm qesharake, por është shembulli më i qartë ku ka degraduar “vizioni” i PD për drejtësinë”.
E mbyllim këtu këtë debat, Lulëzim!
