Administrata Tatimore ka nisur kontrollet ndaj individëve që kanë blerë automjete luksoze, por nuk justifikojnë të ardhurat.
Në një intervistë për Klan News, Drejtori i Përgjithshëm i Tatimeve, Ilir Binaj, tha se qëllimi nuk është gjobitja apo sekuestrimi i mjeteve, por informimi.
“Qëllimi ka qenë që të informojmë publikun në këtë fazë të parë, kush është i përfshirë të vetëkorrigjohet, dhe pastaj në një hap të dytë ne do shikojmë më në detaj pasi t’i thërrasim individët për t’i dhënë sqarimet e duhura në lidhje me këto të ardhura të cilat ata i kanë përdorur për të blerë këto automjete. Afat nuk ka të përcaktuar nga ky moment.
Çdo njeri që e ka këtë lloj situate mund ta bëjë menjëherë, që në kohën kur ne ta mbyllim këtë proces të analizës dhe identifikimit dhe mbledhjes së informacioneve nga bankat dhe palë të treta, dhe të fillojmë kontrollet, këta mund ta kenë përmbushur këtë dhe kjo mund të zgjasë 1-2 muaj”.
Gjatë kohës që tatimet po bëjnë analizën dhe verifikimet e transaksioneve, këta individë, sipas Binajt kanë mundësinë që të bëjnë deklarimin e të ardhurve dhe nëpërmjet DIVA-s, në të kundërt kanë penalitete.
“Të bëjnë një deklaratë DIVA për 2024. Nëse ai nuk e bën dhe në kohën që ne pastaj do fillojmë investigimin me persona drejtpërdrejt, atëherë do jetë i detyruar që të marri dhe penalitete për këto të ardhura të padeklaruara nëse rezultojnë si të tilla. Fillimisht do jetë tatimi mbi të ardhurat, 15% për këto të ardhura të padeklaruara, dhe pastaj janë penalitetet që ka Kodi i Procedurës Tatimore”.
Në total janë 400 automjete me vlerë mbi 50 mijë Euro, pronarët e të cilëve nuk janë të regjistruar në organet tatimore.
“Neve kemi marrë 50 mijë Euro e lart që përzgjedhur si transaksione që plotësojnë këtë kusht. Përqëndrimi më i madh ka qenë në Tiranë, në rrethe të tjera kanë qenë më pak”.
Pjesë e kësaj analize do jenë edhe rastet e dhurimit.
“Në fund të ditës do që të saktësosh nga kanë ardhur këto të ardhura dhe a janë të taksuara më parë apo jo. Nëse rezulton që janë të taksuara dhe ky ka bërë një dhuratë dhe është në përputhje me ligjin, kjo dhuratë nuk është e tatueshme”.
Mes markave të makinave të luksit që mbizotërojnë janë Buggati, Mercedes-Benz, Lamborghini dhe Bentley.
Klan News
