Suksesi historik me Shqipërinë, kualifikimi në finalet e “Euro 2016”, ia kanë rritur shumë “kredencialet” Xhani De Biazit.
Trajneri i kuqezinjve lakohet tashmë në klube të ndryshme, ndërkohë që vetë ka pohuar se ka refuzuar një ofertë prej 2 milionë eurosh në sezon nga Katari.
Në konferencën për shtyp të para dy ditëve, 59vjeçari nga Sarmede e “dribloi” pyetjen mbi të ardhmen e tij, pas finaleve të “Euro 2016”, ndërsa përditë e më shumë po përflitet për një largim të tij.
Kuptohet, kërkon një eksperiencë të re, si kushdo në karrierë, por edhe e di mirë se nuk ka çfarë arrin me Shqipërinë në fushatën kualifikuese.
Nga atdheu i tij, Italia, vijnë zëra se është kandidat potencial për të pasuar Antonio Conten në stolin e axurrëve, ndërsa sot, gazeta kryeqytetase, “Roma Today”, shkruan edhe për një “flirt” të drejtuesve të Lazios me trajnerin e kombëtares së Shqipërisë.
Një pistë tejet e besueshme kjo, për faktin se aty ndodhet një shqiptar, në rolin e drejtorit sportive, që merret me transferimet e lojtrarëve dhe trajnerëve.
Igli Tare e ka shfaqur në më shumë se një herë simpatinë që ka për De Biazin, si trajner, ndaj po kërkon ta ketë në krye të bardhekaltërve për sezonin e ardhshëm. “Roma Today” shkruan se zgjedhja e parë e presidentit Lotito është serbi Mihajloviç, për postin e Piolit.
Në përfundim të ndeshjes RomaLazio 20, Tare është ballafaquar me një grup tifozësh lazialë.
“Në rast të një situate të vështirë, të largimit para fundit të kampionatit të Stefano Piolit, Simone Inzaghi është i gatshëm të marrë përsipër drejtimin e Lazios. Shumë i kuotuar është trajneri i Shqipërisë, Gianni De Biazi,” – shkruan kjo media kryeqytetase, në Romë.
Ndërkohë, duke ditur përplasjet që ka pasur Igli Tare me Mihajloviç, gjatë kohës si futbollistë, është e qartë se bashkëpunimi mes tyre te Lazio, në një rast hipotetik, do të kishte doza të theksuara nacionaliteti, por edhe të së shkuarës, si pengesë e madhe.
Kësisoji, Tare do të preferonte para De Biazin, të cilin nuk kursehet t’ia rrëmbejë Shqipërisë.
