Kandidati i Erdogan, në zgjedhjet e përsëritura për Kryetar Bashkie në Stamboll, Binali Yildirim, pranoi humbjen ndaj kandidatit të opozitës, Ekrem Imamoglu.
Votimi i së dielës u mbajt pas anulimit të debatueshëm nga ana e zyrtarëve të zgjedhjeve të fitores së parë historike të Imamoglu në mars, për teknikalitete pasi Presidenti Recep Tayyip Erdogan e kundërshtoi humbjen e kandidatit të tij.
Autoritetet e zgjedhjeve i hodhën poshtë pretendimet e partisë AKP të Erdogan për manipulime, por urdhëruan rivotimin me argumentimin se disa nga fletët e votimit ishin të palexueshme. Opozita e dënoi vendimin dhe tha se votimi i së dielës ishte më i rëndësishëm se sa thjesht për të përcaktuar se kush do ta udhëhiqte qytetin.
Në një tregues të rëndësisë së zgjedhjeve, votimi filloi herët dhe me ritme të shpejta në një qytet kur zakonisht banorët votojnë vonë. Pjesëmarrja ishte e lartë.
Vëzhguesit thonë se strategjia e Imamoglu për të shmangur politikën polarizuese dhe premtimi për gjithëpërfshirje, luajtën rol kyç në fitoren e CHP-së.
Edhe të dielën opozita u fokusua tek mesazhi i rregullimit të demokracisë së dëmtuar të vendit dhe tek varfëria urbane që është zgjeruar që pas recesionit të vitit 2018. Kështu Stambolli shkëputet pas 25 vitesh nga kontrolli i partisë së Presidentit Erdogan./ Opinion.al
