Një 34-vjeçar shqiptar është dënuar me burg në Australi, pasi akuzohet se ka luftuar për grupet terroriste në Siri.
Sipas mediave të huaja, ai është tallur online rreth prerjes së kokave të të burgosurve. Për këto arsye Agim Ajazi është dënuar me 8 vite e 2 muaj burgim.
Autoritetet thonë se nga viti 2014, Agim Ajazi kalonte rregullisht kufirin sirian nga Turqia për të luftuar. Ai gjithashtu bënte postime në mediat sociale duke inkurajuar dhunën, duke përfshirë talljet për ekzekutimet e njerëzve.
Ajazi u deklarua fajtor për tre akuza në Gjykatën e Lartë në Brisbane në fund të vitit të kaluar, duke përfshirë mbrojtjen e terrorizmit dhe përfshirjen në aktivitete armiqësore në një vend të huaj.
Muajin e kaluar gjykata dëgjoi 34-vjeçarin, i cili jetonte në Gold Coast. Nga viti 2014, ai kalonte rregullisht kufirin sirian për të luftuar si ushtar këmbësorie në beteja “jashtëzakonisht të egra”.
Gjykata thotë se Ajazi e bëri këtë për një periudhë prej dy vjetësh, me synimin për të “përmbysur qeverinë siriane me forcë” dhe “të krijojë një qeveri shtetërore sipas ligjit të Sheriatit”.
Gjithashtu, gjatë kësaj kohe, Ajazi bëri postime të rregullta në mediat sociale, nganjëherë duke u tallur për prerjen e kokës të të burgosurve që u kapën gjatë betejës, por nuk pretendohej se kishte kryer ndonjë ekzekutim.
Ai po ashtu bënte postime edhe duke inkurajuar amerikanët të “hyjnë në kishat ruse dhe të fillojnë të presin kokat” dhe “të fillojnë të shpërthejnë” brenda konsullatës ruse.
Ajazi ka më shumë se tre vjet që ndodhet në paraburgim Gjykatësi tha se postimet në mediat sociale “promovonin një ideologji ekstremiste islamike” dhe tregonin se shkelësi ishte “i përkushtuar ndaj aktivitetit armiqësor” në të cilin ishte përfshirë.
Deri më tani, Ajazi ka vuajtur 3 vite në paraburgim. Sipas mediave, në vitin 2026 ai mund të kërkojë lirinë me kusht./Opinion.al
