Presidenti afgan Ashraf Ghani iu drejtua popullit pas një heshtjeje të gjatë ndaj talebanëve që morën më shumë se 18 nga 34 provincat e vendit në tetë ditë. Duke lexuar një teleprompter në deklaratën e regjistruar paraprakisht Ghani tha se është përparësi ri-mobilizimi i Forcave të Sigurisë Kombëtare Afgane dhe se ai do të gjente mënyra për të ndihmuar mijëra njerëz të zhvendosur nga shtëpitë në të gjithë vendin.
“Ne kemi mbajtur konsultime të gjera me të gjithë faktorët brenda qeverisë dhe partnerët ndërkombëtarë … Konsultimet janë duke vazhduar dhe rezultatet do të njoftohen së shpejti,” tha presidenti të Shtunën.
Duke iu drejtuar publikut afgan, Ghani tha: “Unë e kuptoj që jeni të shqetësuar për të ardhmen tuaj, ju siguroj si presidenti juaj se do të përqendrohem në parandalimin e dhunës dhe shpërnguljes së popullit tim”.
Kujtojmë se kjo deklaratë e Ghanit vjen në të njëjtën ditë kur 3,000 forca të Shteteve të Bashkuara mbërritën në kryeqytetin, Kabul, për të siguruar Aeroportin Ndërkombëtar Hamid Karzai, ndërsa raportohet se talebnët janë vetëm 11 km larg Kabulit.
Haroun Rahimi, asistent profesor i drejtësisë në Universitetin Amerikan të Afganistanit, tha se nuk kishte gjasa që Ghani të mbante premtimet e tij.
“Asgjë nuk është më në kontroll dhe nuk ka të bëjë më me Presidentin Ghani. Ka të bëjë me kalimin e rregullt, me sa më pak gjak dhe sa më shpejt të jetë e mundur. Lufta është në dyert e Kabulit. Raportimet tregojnë se Kabuli është i rrethuar. Koha nuk është në anën e qeverisë, “tha Rahimi për Al Jazeera./Opinion.al
