Talebanët do të njoftojnë qeverinë e re të Afganistanit javën e ardhshme. Zëdhënësi Zabihullah Mujahid i tha agjencisë së lajmeve “Reuters” se ishin caktuar zyrtarët që do të drejtonin institucionet kryesore, përfshirë ministritë e shëndetit dhe arsimit publik dhe bankën qendrore. Zëdhënësi më pas tha se problemet ekonomike do të lehtësohen sapo qeveria të marrë detyrën.
“Rënia e monedhës vendase kundrejt valutës së huaj është e përkohshme dhe është për shkak të situatës që ndryshoi papritur. Ajo do të kthehet në normalitet sapo sistemi qeveritar të fillojë të funksionojë”, tha ai.
Ndërkohë trupat amerikane filluan tërheqjen e tyre nga aeroporti i Kabulit, njoftoi të shtunën Pentagoni, pas një operacioni për më shumë se dy javë në përpjekje për të nxjerrë nga Afganistani shtetasit amerikanë dhe aleatët e tyre afganë të cilëve iu rrezikohet jeta nën drejtimin e talebanëve.
Një zyrtar amerikan i tha agjencisë së lajmeve “Reuters” se kishte më pak se 4000 trupa të mbetura në aeroport, nga 5800 që u dërguan për misionin e evakuimit. Zëdhënësi i Pentagonit John Kirby më vonë u konfirmoi gazetarëve se tërheqja kishte filluar, por nuk pranoi të jepte një numër sa forca amerikane ishin ende në Kabul.
