Në fund të muajit shtator, qeveria do të ketë gati ligjin për llogaritjen e taksës së shtëpive sipas vlerës së tregut. Pas kërkesave të vazhdueshme të Fondit Monetar Ndërkombëtar për futjen e taksës së re të pronës, qeveria ka rënë dakord me ndërkombëtarët se zbatimi i saj do të nisë si projekt pilot në Tiranë. Plani i qeverisë për implementimin e taksës së shtëpive zbardhet në letrën që ministri i Financave, Arben Ahmetaj, i ka dërguar Fondit Monetar Ndërkombëtar.
Kreu i Financave, Ahmetaj, shprehet se në fund të muajit shtator të këtij viti do të jetë gati formula e llogaritjes dhe se zbatimi i taksës së re nis në fillim të 2017-s, si projekt pilot në Tiranë. Ministri shprehet edhe për ngritjen e një grupi pune të përbashkët mes zyrës të regjistrimit të pasurive dhe shoqatës të vendorëve. “Si hap të parë, ne do të krijojmë një grup pune mes Ministrisë së Financave, Zyrës së Regjistrimit të Pasurive të Paluajtshme dhe Shoqatës së Bashkive.
Ne do të përgatisim një raport për zhvillimin e kadastrës fiskale, përgjegjësitë ligjore dhe proceset për hartimin dhe mbledhjen e të dhënave për vlerësimin e pronës. Ne do të përshpejtojmë dixhitalizimin e regjistrit. Paralelisht, me ndihmën e Fondit ne do të hartojmë ligjin me metodologjinë dhe formulën e vlerësimit deri në fund të shtatorit të vitit 2016.
Nga fundi i 2016s, legjislacioni për zbatimin e tatimit të pronës me bazë vlerësimi do të miratohet nga Parlamenti. Nga 2017, metodologjia e re për tatimin e pronës do të aplikohet në Tiranë, si projekt pilot”, thuhet në letrën e ministrit të Financave dërguar Fondit. Për nisjen e tatimit të ri të shtëpive në Tiranë qeveria ka rënë dakord me Fondin Monetar Ndërkombëtar, ku në raportin për vlerësimin e ekonomisë lajmëron zbatimin e taksës së re në 2017n. Fondi vlerëson amnistinë për rivlerësimin e shtëpive, pasi sipas tij do të rrisë deklarimin vullnetar të pronës.
“Duke filluar në vitin 2017, metodologjia e re për tatimin e pronës mbi vlerën e tregut do të aplikohet në Tiranë si projekt pilot. Për të inkurajuar rivlerësim vullnetar të vlerësimit të pronës, autoritetet njoftuan një reduktim të përkohshëm në tatimin mbi fitimin për vlerë simin e pronës prej 15 për qind në 2 për qind”, thuhet në raportin e FMN-së. /Panorama
