Në një konferencë të mbajtur ditën e sotme me ministren e Infrastrukturës dhe Energjisë, Belinda Balluku, kryeministri, Edi Rama deklaroi se nuk do të hiqet asnjë taksë për naftën për të sjellë ulje të çmimit të saj.
Kreu i qeverisë i cilësoi absurde këto propozime, duke theksuar më tej se qeveria po mban të palëvizur çmimin e energjisë për familjarët dhe biznesin e vogël dhe kjo sipas Ramës po kushton çdo ditë shumë.
“Duhet të kemi bindjen që ashtu si ia dolëm në dy përballje e tjera do ia dalim edhe me këtë. Kjo është më e keqja në të tjera. Ka edhe propozime absurde për të hequr taksat e naftës. Kjo qeveri po bën atë që nuk e ka bërë asnjë qeveri tjetër rreth e rrotull edhe më gjerë. Po mban të palëvizur çmimin e energjisë për familjarët dhe biznesin e vogël. Kjo kushton çdo ditë shumë. Dhe kjo kosto përballet falë kontributeve.
Se është kollaj të themi të heqim këtë e atë. Kemi hequr nga të gjitha llojet e taksave dhe nuk ka më hapësirë për të hequr asgjë. Kemi hequr TVSH për biznesin e vogël. Kemi përgjysmuar taksat për pagën 500 mijë lekë. Nuk ka ku shkojmë më tej me heqjet.
Po e mbajmë me “dhëmbë” çmimin e energjisë që mos rritet, është çmimi i një malli që sidoqoftë mundësia për të ndërhyrë është aty dhe nuk është si nafta që është komplet operacion i sipërmarrjes private”, u shpreh Rama.
