Ditën e sotme Benet Beci ka marrë zyrtarisht detyrën si kryetar bashkie në Shkodër.
Pas betimit dhe konstituimit të këshillit bashkiak Benet Beci iu drejtua zyrës së kryetarit ku pararadhësi i tij Bardh Spahia i dorëzoi detyrën.
Pas marres së detyrës nga Beci, ka reaguar Spahia i cili thotë se ka zhvilluar një takim prej 10 minutash me kryebashkiakun e ri.
Spahia thotë se gjatë takimit është shprehur se Becit i ka deklaruar se zgjedhjet e 14 maijt u vodhën dhe se kryeministri Edi Rama ka bërë shantazhe ndaj qytetarëve duke thënë se nuk do të jepte fonde për bashkinë nëse zgjedhje fitoheshin nga koalicioni “Bashkë Fitojmë”
Postimi i Bardh Spahisë
Sot prita në zyrë z. Benet Beci. E bëra me kulturën e qytetarisë me të cilën jam rritur dhe e kam trashëguar prej Shkodrës time.
Por pa dyshim në ato 10 minuta takim, i përsërita z. Beci ç’ka kam shprehur publikisht në mënyrë të përsëritur, se në Shkodër nuk pati zgjedhje, por një masakër të vërtetë elektorale, ku votat u blenë masivisht me milionat e eurove të hedhura nga pushteti, u grabitën me dhunë e kërcënime të paprecedent nga krimi i organizuar i mbështetur dhe koordinuar nga vetë shteti, të shoqëruara me retorikën shantazhuese të kryeministrit, për mosdhënie investimesh për Shkodrën. Kjo nuk ka ndodhur kurrë në 32 vjet pluralizëm dhe është një njollë e errët, që do i shoqërojë, të gjithë ata që u bënë pjesë e vjedhjes dhe deformimit të vullnetit të zgjedhësve.
Mirënjohje e respekt bashkëqytetarëve të mi, të gjithëve që më mbështetën si në këto zgjedhje ashtu edhe gjatë rrugëtimit të shkurtër në krye të bashkisë.
Qytetaria, dinjiteti dhe integriteti janë tiparet që na dallojnë, e që padyshim do na bëjnë prapë bashkë shumë shpejt, sepse ne demokratët e kemi provuar që jemi qëndrestarë!
