Kryeministri i Kosovës, Albin Kurti nuk i është përgjigjur ftesës së Presidentit Thaçi për tu takuar ditën e hënë.
Kabineti i kryeministrit ka njoftuar në një deklaratë për mediat se kryeministri do të jetë pjesë e seancës së Kuvendit të Kosovës, në të cilin do të flasë Vasfije Krasniqi-Goodman, një prej viktimave të dhunës seksuale gjatë luftës së fundit në Kosovë.
Me rastin e shënimit të 8 Marsit, Ditës Ndërkombëtare të Gruas, Kuvendi i Kosovës ka organizuar seancë të veçantë, kushtuar sensibilizimit të çështjes së viktimave të dhunës seksuale gjatë luftës së vitit 1999 Kosovë.
Përveç kësaj seance, Kurti ka përmendur edhe arsye tjera për të mos e takuar sot presidentin.
“Presidenti sot e paska lënë t’i takojë krerët e partive. Si kryetar i Lëvizjes VETËVENDOSJE! nuk kam as interes e as gatishmëri ta takoj presidentin aktual. Si kryeministër e kam obligim. Takohemi një ditë tjetër kur të mbarojë me partitë”, është thënë mes tjerash në arsyetimin e kryeministrit.
Presidenti i Kosovës ka ftuar kryetarët e partive më të mëdha politike për takim të hënën me qëllim të, siç është thënë, informimit, konsultimit dhe koordinimit për çështje të interesit shtetëror.
Nga ana e tij Kurti ka thënë dhe e ka përmendur edhe e letrën e drejtuar Presidentit të SHBA, Donald Trump se procesin e dialogut dhe negociatave mes Kosovës dhe Serbisë do ta udhëheqë vetë ai dhe qeveria e cila siç thotë ai është mandatar për këtë detyrë. Kryeministri Kurti nuk e ka pranuar presidentin Thaçi si pjesë të këtij procesi. Kryetarja e Kuvendit dhe partnerja në koalicion Vjollca Osmani refuzoi dy javë më parë kërkesën e presidentit Thaçi për një seancë ku ai kërkoi të fliste në lidhje me takimin që kishte patur në Shtëpinë e Bardhë me presidentin serb Aleksandër Vuçiç. /Opinion.al
