Ministri i Brendshëm, Fatmir Xhafaj, ditën e sotme, është takuar me ambasadorin amerikan Donald Lu dhe ambasadoren e Bashkimit Europian, Romana Vlahutin.
Lajmi është konfirmuar nga vetë ministri Xhafaj në rrjetin social Twitter, i cili shkruan se me dy diplomatët u diskutua për strategjinë e re në luftën kundër krimit të organizuar.
Ai thekson se ky është një lajm shumë i pritur nga Ambasadori Amerikan, ku shumë shpejt në Tiranë mbërrijnë ekspertët e FBI-së, që do vendosen në Ministrinë e Brendshme.
“Takim konstruktiv me Ambasadorët Lu dhe Vlahutin. Mbështetje teknike & financiare për Strategjinë e Re në luftë kundër krimit të organizuar. Një lajm i shumë pritur nga Ambasadori Amerikan: Shumë shpejt mbërrijnë në Tiranë ekspertët e FBI që do vendosen në MB. Faleminderit SHBA”, shkruan Xhafaj.
Risjellim në kujtesë, se në muajin nëntor, pritet që në Shqipëri të mbërrijnë agjentë amerikanë të FBI-së.
