Përfaqësuesit e Ukrainës dhe Rusisë këtë të martë pritet që të zhvillojnë raundin e radhës së bisedimeve për gjetjen e një rruge të përbashkët për vendosjen e paqes në Stamboll të Turqisë.
Ndërkohë Presidenti i Turqisë, Rexhep Tajip Erdogan, u është drejtuar delegatëve përpara fillimit të bisedimeve. Erdogan e ka cilësuar Presidentin Vladimir Putin dhe Presidentin Volodymyr Zelenskiy si “miq të çmuar” të tij.
Ai tha se përparimi në bisedime do të hapte rrugën për takimin e Putinit dhe Zelenskyit- dhe se Turqia mund të jetë vendi pritës i këtij takimi. Ai u thotë gjithashtu ekipeve ruse dhe ukrainase se të dyja palët kanë “shqetësime legjitime”, por ka arritur në një moment kur bisedimet duhet të japin “rezultate konkrete”.
Erdogan thekson se vendosja e paqes nuk do të thotë se ka një palë humbëse dhe se vazhdimi i konfliktit nuk i sjell dobi askujt.
“Në një moment kaq kritik, ne jemi të kënaqur t’ju mirëpresim dhe të kontribuojmë në përpjekjet tuaja për të vendosur paqen,” thotë ai, duke shtuar: “Uroj që takimet dhe diskutimet tona të jenë të favorshme për vendet tuaja, rajonin tonë dhe mbarë njerëzimin. .”
Ai ka bërë thirrje për një armëpushim të menjëhershëm dhe thotë se ndalimi i tragjedisë varet nga të dyja palët./Opinion.al
