Kryetarja e Lëvizjes Socialiste për Integrim, Monika Kryemadhi, ka folur për mediat pas takimit prej 70 minutash me zëvendësndihmës Sekretarin Amerikan të Shtetit, Matthew Palmer.
Kryemadhi nuk ka dhënë shumë detaje në lidhje se çfarë u diskutua gjatë takimit, por ka thënë se kërkesat e opozitës për luftën kundër korrupsionit përputhen me Departamentin Amerikan të Shtetit.
Kryetarja e LSI tha se Palmer nuk kishte ardhur për t’i dhënë zgjidhje sa i përket konfliktit politik, pasi sipas saj, hallet e vendit do t’i zgjidhin vetë shqiptarët.
“Palmer shprehu opsionet e veta nga këndvështrimet e tij, ne shprehëm opsionet tona në këndvështrimet tona. Përputhen sa i përket raportit të Departamentit Amerikan të Shtetit për luftën kundër korrupsionit, për kapjen e shtetit, për të gjitha problemet e tjera.
Është shumë i rëndësishëm vazhdimi i mëtejshëm për zgjidhjen përfundimtare dhe për t’i dhënë fund tranzicionit shqiptar. Shqipëria e ka vendin në BE. Zoti Palmer nuk kishte ardhur për t’i dhënë zgjidhje sa i përket konfliktit. Mos harroni që hallet tona do t’i zgjidhim ne shqiptarët vetë me njëri-tjetrin. Sigurisht që mendoj se viktimat e të gjithë kësaj janë shqiptarët, nuk është kryeministri”, u shpreh Kryemadhi./ Opinion.al E.Xh.
