Megjithëse ka thënë në disa studio se nuk e komenton kundërshtarin e tij politik jashtë kufijve të Shqipërisë, Kryeministri Rama nuk nguroi sot ti quajë ‘koncerte’ protestat e opozitës në një forum ku po merr pjesë në Londër. Ai lajmëroi dje pjesëmarrjen në një forum mbi mundësitë e investimit në Ballkanin Perëndimor dhe zgjodhi të joshte investitorët në një mënyrë aspak të përgjegjshme për një kryeministër.
“Madje protestat mund të jenë pjesë e paketave turistike. Sepse ndodhin si të ishin koncerte, të shtunave në orën 8:00. Kështu që nëse doni, prenotoni dhe mund ta shikoni. Nuk është i gjithë vendi në flakë, ata vijnë aty, hedhin molotovët e tyre, por nëse qëndroni në distancë, mund ta shijoni dhe këtë nuk e gjeni në Europë në këtë moment” tha Rama.
Kryeministri i tha të pranishmëve se në Shqipëri nuk po ndodh një revolucion por një protestë politike. Paralelizimi i aksionit të opozitës me një revolucion bëhet në fatk për herë të parë nga vetë kryeministri, por nuk është edhe aq korrekt sepse revolucionet ndodhin për të rrëzuar regjime. Në rast se në Europë do të mendonin se në Shqipëri po ndodh një revolucion atëherë do të mendonin që këtu është instaluar edhe një regjim.
Rama shtoi në fjalën e tij për të joshur investitorët se Shqipëria është një prej vendeve më pro europiane në rajon pasi nuk kemi asnjë parti anti-europiane.
“Ne jemi vendi më pro europian në rajon. Kemi myslimanë dhe të krishterë, por myslimanët tanë janë pa dyshim më europianë se sa votuesit e partisë së Marine le Pen. Nuk ka asnjë parti anti europiane. Ne jemi pjesë e Europës, jemi të rrethuar nga shtetet e Bashkimit Europian” tha ai.
Kjo retorikë, tepër populiste kur vihet përballë njerëzve të botës së biznesit dhe sipërmarrjeve, presupozon se nëqoftëse një vend ka parti ‘anti-europiane’ (koncept që në vetvete ka nevojë për shtjellim pasi është tepër i interpretueshëm) atëherë ai është ‘anti-europian’ dhe jo i përshtatshëm për investime. Domethënë lini Holandën, Francën, Mbretërinë e Bashkuar, Italinë e pothuajse gjithë vendet europiane e hajde investoni në Shqipëri. A thua se investitorët shqetësohen më shumë për nivelin e europianizmit sesa për sigurinë e sistemit gjyqësor që ka vendi, stabilitetin e tij financiar dhe taksat. Këto të fundit mbetën ende të paditura për ata që kishin ardhur të dëgjonin për Shqipërinë. /Opinion.al
