Përfaqësuesit e Këshillit Politik për Reformën Zgjedhore janë mbledhur sot në tryezë sëbashku me ekspertët për të rinisur procesin që kishte ngrirë për pothuajse dy javë.
Opozita ka shkuar në tryezën e sotme me tre propozime konkrete lidhur me financimin e partive, kuotat gjinore dhe periudhën zgjedhore.
Opozita propozon që financimi nga privati të jetë sa gjysma e financimit nga shteti. Aktualisht, partitë lejohen të shpenzojnë sa 10 herë shuma e financimit publik. Psh. Kur ajo merr nga buxheti 30 milionë lekë, financimi privat do të jetë 15 milionë lekë dhe jo 300 milionë, siç është aktualisht. Ligji shton mekanizmat shtetërorë e kontrollit të shpenzimeve në fushatë, me qëllim eleminimin e përdorimit të parave të pista në zgjedhje.
Sa i përket kuotave gjinore, opozita kërkon që 1 ndër 3 emrat e parë të listës të jetë grua, dhe që partitë apo koalicionet të kenë aq kandidatë sa numri i mandateve në qark. Aktualisht lista e pakufizuar dhe vendosja e grave në fund të listës e bën joefektive kuotën 30% sipas opozitës. Si sanksion për shkeljen e kuotës gjinore nuk propozohet gjoba, por refuzimi i regjistrimit të listës për qarkun përkatës.
Opozita kërkon gjithashtu shkurtimin e periudhës zgjedhore në të dy sezonet e parashikuar aktualë. Nga 3 muaj kërkohet që të bëhet 1 muaj. Opozita propozon që zgjedhjet të mos zhvillohen në periudha që ndikojnë në sezonin turistik, por t’u jepet qytetarëve çdo mundësi për të ushtruar të drejtën e votës. Periudhat e zgjedhjeve të propozuara nga opozita janë 15 Prill-15 Maj dhe 15 Tetor – 15 Nëntor. /Opinioin.al
