Kryeministri shqiptar, Edi Rama do të takohet sot në Bruksel me presidentin e SHBA, Donald Trump. Ky takim është njoftuar nga vetë kreu i qeverisë shqiptare, në një postim në facebook.
“Ju uroj një ditë të mbarë nga Brukseli ku pas takimeve mbrëmë, me Përfaqësuesen e Lartë të BE, Mogherini dhe liderët e Ballkanit Perëndimor për perspektivën europianeve të vendeve tona, vijon sot takimi me Krerët e Shteteve dhe Qeverive të vendeve anëtare të NATO-s, me Presidentin Trump, Kancelaren Merkel, Mbretin e Belgjikës dhe personalitete të tjera”- shkruan kryeministri Edi Rama.
Takimi mund të jetë edhe pak i sikletshëm për Edi Ramën i cili është shprehur kundër zgjedhjes së Donald Trump në krye të Shtëpisë së Bardhë.
Më 14 prill të një viti më parë, në një intervistë për CNN, Rama i pyetur se cfarë do të ndodhë nëse Trump zgjidhet President u shpreh:
“Larg qoftë! Besoj se do të dëmtonte shumë SHBA-në dhe do të dëmtonte shumë botën demokratike, pasi ai, në fund të ditës do të duhet të bënte disa prej gjërave që po thotë se do të bëjë dhe pa dyshim, kjo do të ishte shumë e dëmshme. Gjithashtu, shpresoj që ndërkohë ai të jetë në gjendje të mësojë më shumë mbi botën, të mësojë më shumë mbi myslimanët, të mësojë më shumë se si ka shumë njerëz, që pavarësisht besimit apo etnisë së tyre, jetojnë me krenari me vlerat që Amerika përfaqëson dhe i mbrojnë këto vlera, edhe përmes sakrifikimit të fëmijëve të tyre, në luftrat që bëjnë përkrah Amerikës”.
Rama ndodhet në Bruksel i ftuar nga përfaqësuesja e lartë e BE, Federika Mogherini e cila organizoi një mbledhje informale me kryeministrat e vendeve të Ballkanit Perëndimor.
Në qendër të këtij takimi ka qenë rruga përpara për perspektivën e rajonit për anëtarësim në BE. /Opinion.al
