Kryeministri i Shqipërisë, Edi Rama dhe kreu i Partisë Demokratike, Lulzim Basha kanë nisur takimin e dytë të tyre në Presidencë në funksion të zgjidhjes së krizës politike. Ndryshe nga radha e parë, Rama dhe Basha do kenë një takim “kokë më kokë” me ndërmjetësim të presidentit Nishani.
Ajo që bie më shumë në sy nga gjithë kjo histori është se takimi vjen pas dy deklaratave tërësisht radikale të kryeministrit Rama dhe kreut të opozitës Basha nga ana tjetër.
Historia e negociatave po shkonte dita-ditës drejt zeros, ku të linte përshtypjen se shpresa më e vogël qe shuar. Në mesditën e sotme, Rama i uli në maksimum ofertat e tij për opozitën. Nga krahu tjetër, Lulzim Basha refuzoi të ulë stekën më poshtë deklarimeve të tij.
Mediat kanë bërë me dije se kryeministri edhe privatisht i kishte thënë stafit të tij se ndjehej i lodhur dhe i neveritur nga gjithë kjo situatë e krijuar, ndërsa nuk mbetej opsion tjetër përveç zgjedhjeve. Gjithpoaq, kreu i opozitës kishte lënë të kuptojë se gjithçka ka mbaruar dhe PD-ja duhet të bëhet gati për rrugën radikale.
Megjithatë, shpresa vdes e fundit…
