Në lidhje me takimin Basha-Meta këtë të martë, nga qeveria ka reaguar ministrja Elisa Spiropali. Kjo e fundit me një reagim në Twitter, thekson se zgjedhjet e ardhshme do të jenë më 2021 dhe as që mendohet të ketë zgjedhje të tjera. Spiropali i kërkon Bashës që të mos merret më me 30 qershorin, se këto zgjedhje tashmë janë kryer, por të hedhë sytë te zgjedhjet e 2021.
“Lulzim aman ndërro pllakën e gramafonit se s’dëgjohet më as ajo kënga monotone, po veç gërvishtjet e pllakës! Ndërroje atë dreq pllake dhe harroje 30 qershorin bashkë me Baba Xhiken se po të ikën edhe qershori 2021”, shkruan Spiroali në Twitter.
Për 30 minuta Lulzim Basha, ka zhvilluar një takim me Ilir Metën në Presidencë mëngjesin e së martës.
Në lidhje me këtë takim Basha tha për gazetarët: “Kreu i Shtetit mendon se 13 tetori është një mundësi për daljen nga kriza politike. Duke vlerësuar maksimalisht shqetësimin e tij, i kam bërë të qartë që opozita është në këtë betejë për interesin e njerëzve, për t’i garantuar shqiptarëve të drejtën e votës dhe për të garantuar një qeveri që buron nga njerëzit dhe i shërben njerëzve. Kemi diskutuar për hapat e mëtejshëm politikë, në raport me zgjidhjet që presin dhe do t’u ofrojmë shqiptarëve”.
Maxhoranca nuk e njeh dekretin e Metës për 13 tetorin, ndërsa opozita dhe Presidenti nuk njohin 30 qershorin./ Opinion.al
