Kryeministrja tajlandeze, Paetongtarn Shinawatra, u shkarkua nga Gjykata Kushtetuese, duke çuar në kaos politikën në vend dhe duke i dhënë një goditje dinastisë më të fuqishme politike që ka udhëhequr disa qeveri.
Ajo u ndëshkua për shkelje të etikës, në një bisedë telefonike që u bë publike në qershor, ku dëgjohej teksa e quante ish-liderin e Kamboxhias, Hun Sen, “xhaxha” dhe kritikonte ushtrinë tajlandeze, mes përkeqësimit të tensioneve mes dy vendeve.
Biseda, e zbuluar nga vetë Hun Sen, dëmtoi reputacionin e kryeministres me kritikët që e akuzuan se po minonte ushtrinë vendase.
Vendimi e bën 39-vjeçaren, e cila është vajza e ish-kryeministrit Thaksin Shinawatra, udhëheqësen e pestë që shkarkohet nga detyra nga gjykata që prej vitit 2008. Të premten, 9 gjykatës të Kushtetueses votuan 6 pro dhe 3 kundër Shinawatras, duke vendosur se veprimet e saj shkelën standardet etike të postit që ajo mbante.
Sipas gjykatës, kryeministrja kishte krijuar marrëdhënie personale duke mbajtur anën e Kamboxhias dhe hodhi poshtë pretendimin e saj se telefonata ishte negociatë për të risjellë paqen pa përdorur dhunën. Telefonata me Hun Sen, dikur mik i ngushtë i babait të saj, u zhvillua në një kohë kur tensionet në kufirin mes Tajlandës dhe Kamboxhias çuan në një konflikt 5-ditor, ku dhjetëra njerëz u vranë dhe qindra mijëra u shpërngulën.
