Dorëzohet arma e parë, pas nisjes së fushatës së Ministrisë së Brendshme për mbledhjen e armëve pa leje. Ai ka qenë një 85vjeçar i cili është paraqitur këto ditë në Komisariatin e Policisë Nr. 4 në kryeqytet dhe ka dorëzuar një automatik.
“Më datë 03.12.2016, shtetasi M.Ll, vjeç 85, banues në Tiranë, ka dorëzuar një automatik model 56, dhe një karikator me 25 fishekë”, njofton Policia.
Materialet u referuan në Prokurorinë e Rrethit Gjyqësor Tiranë, për vlerësim.
Disa ditë më parë ministri i Brendshëm Saimir Tahiri theksoi se për të gjithë ata që i dorëzojnë armët pa leje vullnetarisht, nuk do të ketë ndjekje penale./ Panorama.al
