“Policia e Gjeneratës tjetër”, quhet shfaqja e vënë në skenë paraditen e sotme. I pari e mori fjalën para policëve të ulur në sallë, ministri i Brendshëm, Saimir Tahiri e më pas Kryeministri i vendit, Edi Rama.
Më shumë se sa për problemet me të cilat ndeshet Policia e Shtetit çdo dite, flitet për politike. “Qeveria e shkuar ju ka tradhuar”, tha Tahiri, duke shtuar “nga 2005-2013 policia ka qenë më e keqtrajtuara financiarisht”. Sipas tij, një punonjës policie merrte 34% me pak se punonjesit e administratës. “Madje një punonjës policie i Patrullës së Përgjithshme kishte pagë më të ulët se një punonjës pastrimi në administratë”, tha Tahiri. “Ne u angazhuam që tradhëtinë e Qeverisë së shkuar ta kthejmë në besim dhe mbështetje për Policinë”, vijoi ai.
Sakaq ai premtoi rritje pagash. “Sot është dita për një lajm të mirë! Po, pagat e mbi 11 mijë punonjësve të policisë në të gjithë Shqipërinë, do të rriten nga Janari 2017. Faleminderit zoti Kryeministër! Do rrisim pagat e policëve të nivelit bazë me rreth 17% ose në vlerë absolute me një rritje 10.070 lekë. Për t’ju marr një shembull, paga e inspektorit në vitin 2017 bëhet 69 mijë lekë, pra krahasuar me vitin 2013, rritet 45%”, u shpreh Tahiri në takimin me disa policë, i cili po transmetohet live në TV.
