Pasditen e vonë të së mërkurës doli lajmi i bujshëm: Tre drejtues policie janë shpallur në kërkim si të dyshuar se kanë bashkëpunuar me trafikantët e drogës. Tre urdhër-arrestet janë prerë nga Prokuroria e Krimeve të Rënda për: ish-drejtorin e policisë së Vlorës, Jaeld Çela dhe dy vartës të tij, të cilët akuzohen për veprën penale të trafikut të narkotikëve në bashkëpunim.
Ish-drejtuesit e policisë akuzohen se kanë bashkëpunuar me vëllezërit Habilaj, duke i favorizuar ata në kultivimin dhe trafikimin e lëndëve narkotike.
Emri i dytë është Sokol Bode, ish-shefi i Policisë Kufitare të Dhërmiut. Emri i Bodes u lakua disa muaj më parë për shkak të publikimit nga opozita të një fotoje ku ai shfaqej në shoqërinë e Moisi Habilajt.
Fletë-arresti i tretë është për Gjergj Kohila, ish-shef i luftës kundër krimit të organizuar në Vlorë, si dhe drejtues i postës kufitare në Himarë.
Të tre kanë bërë karrierë në polici gjatë kohës që Ministria e Brendshme drejtohej nga Saimir Tahiri, sot person nën hetim për të njëjtën akuzë si vartësit e tij.
Por, edhe pse kanë kaluar 24 orë nga prerja e fletë arresteve ata nuk janë vënë në pranga. Ka dyshime se njëri prej tyre mund të jetë larguar jashtë Shqipërisë, por kjo është e pakonfirmuar.
Nuk ka ende asnjë deklaratë zyrtare nga Policia e Shtetit e drejtuar nga Haki Çako për këtë ngjarje të paprecendet, ku drejtuesit më të lartë të policisë së Vlorës dalin të përshirë në trafikun e drogës.
/Opinion.al
