Ministri i Brendshëm, Saimir Tahiri nga foltorja e Kuvendit tha se suksesi i vërtetë i kësaj qeverie është fakti që e trajton problemin e kanabisit në themel.
Për Ministrin, sukses është të godasësh e të arrestosh sa më shumë. Ai tha se ishte i ndërgjegjshëm që Shqipëria sot nuk është ashtu siç duhet, ndërsa theksoi se beteja kundër drogës nuk është as e qeverisë e as e opozitës, por e Shqipërisë.
“Unë besoj se ka shumë ndër ju në opozitë të cilët nuk lenë vend, shteg, ambasador, tryezë pa etiketuar Shqipërinë, qeverinë, shqiptarët si Kolumbi duke u përpjekur për të deformuar një realitet për të cilët partnerët e të tjerët kanë sy. Kjo ju bën me turp ju, që jeni të gatshëm të shisni interesin madhor kombëtar, vetëm për të blerë ca vota nga të verbërtit si ju. Kjo është qeveria e parë që problemin e kanabisit e trajton në themel dhe nuk ia fsheh shqiptarëve dhe ia thotë, po, ky është problem dhe këtë problem do e zgjidhim ne. Në këtë pikë duhet të bashkoheni edhe ju, në të kundërt heshtni, e mos hidhni akuza ndaj policisë sepse nuk ju kanë asnjë kusur. Sot policia është tjetër gjë, rezultatet janë tjetër gjë dhe kjo është dritarja më e mirë për ju që mund të bëheni bashkë me ne, në një betejë që është e Shqipërisë për sot dhe Shqipërisë së të ardhmes”.
