Dy aleatët e opozitës, Shpëtim Idrizi i PDIU-së dhe Vangjel Dule i PBDNJ-së janë pëprlasur në distanë, në lidhje me tabelat e vendosura në greqisht dhe në shqip, në jug të vendit dhe në zonat minoritare.
Një ditë më parë, Vangjel Dule në një konferencë për mediat shigjetoi aleatin e tij në opozitë duke thënë: “Denoncojmë gjuhën e urrejtjes, por edhe të klithmave për përplasje etnike qe u artikuluan publikisht gjatë këtyre ditëve nga individë, grupe apo edhe forca politike dhe i drejtohemi Prokurorisë për shqyrtimin serioz të tyre”.
Por këtë të mërkurë në një deklaratë të shpërndarë për mediat, Partia Drejtësi, Integrim dhe Unitet thotë se: “Si parti patriotike në një deklaratë kemi denoncuar faktin që tabelat ishin në gjuhën greke dhe pastaj në gjuhën shqipe dhe përtej dy zonave të njohura si minoritare, që në kohën e Mbretit Zog. Ndërkohë u akuzuam nga politikanë të papërgjegjshëm dhe të blerë, se deklarata ishte e padrejtë dhe ne po nxisnim edhe mungesën e bashkëjetesës”.
Tabelat sinjalizuese të rrugëve në jug të vendit, që u hoqën në fundjavë nisën të rivendosen gjatë ditës së martë. Tabela me mbishkrime në shqip si gjuhë e parë dhe më pas greqisht si gjuhë e dytë u vendosën si fillim në zonën pranë ish-Minierës së Kripës. Bashkia Finiq konfirmoi se u rivendosën me fondet e ARRSH-së 10 tabela gjatë së martës.
Në fundjave u hoqën 35 tabela, një investim prej 1,5 milionë lekësh i Bashkisë së Finiqit. Ato u hoqën nga Autoriteti i Rrugëve me arsyetimin se janë jashtë standardi dhe jo në përputhje me Kodin Rrugor. Gjuha e parë në tabelë ishte greqisht dhe e dyta shqip./ Opinion.al
