Në prag të fushatës elektorale, Bashkia e Tiranës ka vendosur të rrisë pagat për punonjësit e saj. Vendimi pritet të merret më datë 5 prill, në mbledhjen e radhës së Këshillit Bashkiak të Tiranës.
Pas rritjes së pagave në nivel qendror, me vendimin e qeverisë së datës 2 mars, edhe njësitë bashkiake kanë të drejtë të caktojnë kufijtë e pagave për funksionarët e saj, thuhet në relacionin e drejtorisë Ekonomike.
Përveç kryetarit dhe n/kryetarëve që janë vetëpërjashtuar nga shtesa mbi pagë, të gjithë funksionarët dhe nëpunësit civilë në Bashkinë e Tiranës do të paguhen 10% më shumë.
Ndërkaq, strukturat e Policisë Bashkiake do të përfitojnë shtesë page prej 15%. Me vendimin e ri, 24 administratorët e njësive bashkiake do të përfitojnë një shtesë prej 10%, duke marrë një pagë që shkon minimalisht 60 mijë për njësitë me më pak se 5 mijë banorë e 115 mijë lekë/ muaj për administratorin e njësive që i kalojnë 50 mijë banorët.
Në të njëjtin nivel shkon masa e rritjes edhe për përgjegjësit e sektorëve, të zyrave e specialistët. Një rritje jo e vogël është vendosur edhe për drejtoritë e punëtorëve të qytetit 1, 2 dhe 3, pagat e të cilëve variojnë nga 30 mijë për pastruesit e deri në 115 mijë për drejtuesit.
*Tabelat e publikuara nga gazeta “Panorama”.
