Ministrja e Shëndetësisë, Ogerta Manastirliu ka prezantuar ditën e sotme në Komisionin e Ligjeve projektligjin “Për kontrollin e kultivimit dhe përpunimit të bimës së kanabisit dhe prodhimit të nënprodukteve të saj për qëllime mjekësorë dhe industriale”.
Gjatë mbledhjes së Komisionit të Ekonomisë dhe Financave, deputetja e Partisë Demokratike Jorida Tabaku kërkoi më shumë informacion nga qeveria sa përket ndikimit në ekonomi të këtij projektligji.
Kjo kërkesë erdhi pasi mazhoranca refuzoi ti jepte përgjigje opozitës mbi pyetjet e ngritura lidhur me ndikimin në ekonomi të kësaj nisme.
Sipas Tabakut, qeveria për herë të parë në 10 vite ka sjellë një ligj mbi hapjen e një sektori të ri dhe opozita nuk ka asnjë informacion për të.
“Ndikimi ekonomik është arsyeja se pse qeveria po e kalon këtë ligj. Pikërisht kjo na intereson dhe ne që të diskutojmë. Kemi bërë pyetje dhe nuk kemi marrë përgjigje nga qeveria. Kjo është e para politike për ekonomi të re, krijimi i një sektori të ri, dhe askush nuk dha llogari se si do zhvillohet ky sektor. Është një ndryshim shumë i madh i politikës ekonomike të qeverisë. Vitet e fundit qeveria nuk ka pasur asnjë politikë ekonomike veç kësaj.
Çfarë sektori keni hapur këto 10 vite? Çfarë ligji ke sjellë këto vite këtu për të zhvilluar ekonomi të re? Kjo është hera e parë që ky komision diskuton një ekonomi të re dhe informacioni që ne kemi është i mangët. Informacioni i qeverisë për këtë ligj është bosh! Nuk asnjë informacion për zhvillimin ekonomik që do të ketë sektori në të ardhmen! Qeveria për herë të parë në këto 10 vite sot ka sjellë një ligj që thotë se do të hapim një sektor të ri dhe ne nuk kemi asnjë informacion! Askush nuk dha llogari se si do të bëhet ky sektor”, tha Tabaku./Opinion.al
