Deputetja e Partisë Demokratike, Jorida Tabaku, të hënën, deklaroi se ekzistojnë mbi 17 mijë transaksione me vlerë mbi 140 mln euro që janë paguar nga buxheti i shtetit vetëm që kryeministri Rama të kryejë punësime politike në administratë, duke favorizuar njerëzit partiakë.
Përmes një shënimi në rrjetin social Facebook, Tabaku thekson se kjo sjellje e qeverisë është qartësisht në dëm të xhepit të shqiptarëve, buxhetit të shtetit dhe mbi të gjitha interesit kombëtar.
“Administrata publike është një kërkesë e qartë e BE-së për procesin e integrimit, paanshmëria politike është një kërkesë e shqiptarëve për të pasur një administratë në shërbim të qeverisë dhe jo partisë. Me sa duket, Partia vjen mbi Atdheun, mbi integrimin për kryeministrin dhe qeverinë”,- thekson ajo.
Sipas saj, përgjimet e shfaqura nga “Zëri i Amerikës” dëshmojnë se kryeministri Rama ka qenë më shumë i interesuar për të mbushur administratën shtetërore me militantë se sa për të integruar vendin në BE.
Tabaku bën me dije se sipas OpenData që pasqyron lëvizjet e thesarit, buxheti i shtetit ka paguar nga viti 2014 deri më tani, 17.5 mld lekë për pagat ndaj punonjësve të larguar arbitrarisht nga puna.
