Deputetja e Partisë Demokratike, Jorida Tabaku, të shtunën, deklaroi se familjet shqiptare po shpënzojnë më shumë para nga buxheti familjar për shkollimin e fëmijëve.
Përmes një shënimi në Facebook, Tabaku thekson se pas reformës në arsim, një familje shqiptare shpenzon nga buxheti i saj familjar 4% të të gjithë të ardhurave, ndërsa përpara reformës shpenzonte 2% të të ardhurave.
Ajo tregon se një rritje me mbi 1500 lekë për të ardhurat që zvogëlohen si pasojë e taksave dhe tarifave.
Tabaku thekson se nxënësit e shkollave fillore dhe të mesme paguajnë sot libra shkollorë që kushtojnë 7.3% më shumë se një vit më parë.
“Sipas të dhënave të INSTAT gjithnjë e më shumë familjet shqiptare heqin bukën e gojës për të mbajtur në shkolla fëmijët e tyre’,-shkruan ajo.
Ndërkaq, oligarkët e qeverisë fitojnë miliona euro nga tenderat, koncesionet, PPP-të dhe gjithfarëlloj shpikjesh, kurse qytetarëve të vendit u mohohet e drejta bazë e arsimit.
“Shqiptarët varfërohen, lihen pa shkollë dhe në injorancë të thellë ndërsa buxheti i shtetit trajtohet si tepsia personale e mazhorancës”,- citohet nga komenti në Facebook.
