Ish-deputetja Jorida Tabaku ka deklaruar se sekuestrimi i 550 tonëve naftë ditën e sotme është pjesë e propagandës së qeverisë pasi pak ditë më parë kësaj kompanie i janë rimbursuar 114 milionë lekë për akcizën.
Tabaku ka publikuar dy dokumente që tregojnë transaksionet e Drejtorisë së Përgjithshme të Doganave drejt kompanisë Tosk Energji, ku në njërin tregohet një rimbursim prej 114 milionë lekësh i datës 7 gusht i këtij viti dhe në tjetrin tregohet totali i rimbursimeve që kap vlerën e 12 milionë dollarëve. Ajo shton gjithashtu se “të njëjtës kompani që pak vite më parë i kanë falur 60 mln euro detyrime”.
“Qeveria pompo me sukses bllokimin e naftës” shkruan Tabaku “por nuk përmend emrin e kompanisë” së cilës sipas saj i është dhënë me konçesion rafineria e Naftës Ballsh dhe është e lidhur me Guvnor dhe kompaninë e falimentuar IRC.
Ish-deputetja shton se në një moment kur qeveria bllokon fondet e bashkisë, duke ju referuar asaj të Shkodrës, nga ana tjetër ajo kryen pagesa “me urgjencë rimbursimin e akcizës kësaj kompanie”. Kjo për Tabakun ngre dyshime se qeveria mund të ketë investuar në propagandën e saj në këmbim të një pjese të vogël të sekuestruar nafte.
“Por megjithëse me një dorë bën propagandën dhe me një tjetër miklon oligarkët, qeveria vazhdon të thellojë gropën e të ardhurave” shkruan ndër të tjera Tabaku. /Opinion.al
