Deputetja e Partisë Demokratike, Jorida Tabaku, ka ngritur sërish shqetësimin për gjendjen e ekonomisë shqiptare, e cila sipas saj mbahet në këmbë vetëm nga shteti dhe jo nga prodhimi real apo rritja e konsumit qytetar.
“Gjysma e rritjes ekonomike sot vjen nga pagat e administratës publike, një administratë që është tashmë përtej çdo limiti dhe kapaciteti. Ndërsa konsumi është rritur me 12.5% vetëm falë shpenzimeve të qeverisë, jo për shkak të fuqisë blerëse të qytetarëve,” u shpreh Tabaku.
Tabaku paralajmëron se modeli ekonomik i ndërtuar nga qeveria po e kthen Shqipërinë pas në kohë, duke e krahasuar me vitet ’80, kur ekonomia ishte e komanduar dhe jo e lirë. Sipas deputetes, tre sektorët kryesorë, bujqësia, energjia dhe industria, janë në rënie, duke sjellë njëkohësisht humbje të vendeve të punës.
“Ky është një model ekonomik pa reforma strukturore, i kriminalizuar nga pastrimi i parave dhe i dëmshëm nga zhvlerësimi i euros. Ai nuk prodhon zhvillim dhe në fund pasojat i vuajnë qytetarët,” tha deputetja demokrate.
Tabaku theksoi se përqendrimi i përfitimeve vetëm tek një pakicë po e kthen buxhetin e shtetit në një instrument në shërbim të interesave të ngushta:
“Buxheti sot nuk është në shërbim të qytetarëve, por fatkeqësisht vetëm në shërbim të pakicës.”
