Bizneset po ankohen në lidhje me administratën tatimore për gjobat e vendosura në mënyrë abuzive dhe në kundërshtim të plotë me ligjin.
Sipas tyre, administrata tatimore ka gjobitur të gjitha ato biznese me xhiro deri në dy milion lekë me vlerën e 10 mijë lekëve me argumentimin se këto biznese nuk kanë deklaruar punonjësit në Drejtorinë e Tatimeve.
Për shqetësimin në fjalë, ka reaguar edhe deputetja e PD-së, Jorida Tabaku, e cila thekson se sjellja e administratës është një dëshmi e qartë e degradimit të shtetit në një aparat përmes të cilit qeveritarët dhe drejtorët e rilindjes pasurohen në kurriz të qytetarëve duke e përdorur ligjin në interes të Maliqit.
Tabaku thekson se në lidhje me administratën tatimore dhe mënyrën e funksionimit të saj, ka shprehur shqetësim të madh edhe FMN.
“E njëjta qeveri që jo më larg se disa javë më parë u kritikua nga FMN dhe institucione të tjera ndërkombëtare për politikat tërësisht të gabuara fiskale që kanë çuar vendin në një qorrsokak dhe që po e përballin atë me krizën e recesionit ekonomik”,-thekson ajo.
Ndër të tjera, deputetja e PD-së, bën me dije se bizneset vazhdojnë të gjobiten në mënyrë absurde. Të cilët duket se i duhet t’i shërbejnë dëshirave të shfrenuara të një qeverie që ka ardhur për të mbrojtur të inkriminuarit dhe për të pasuruar pjesëtarët e saj, ndërsa në treg shet propagandën e qeverisë në shërbim të popullit.
