Dy ndryshime të detyruara dhe një zgjedhje teknike për të freskuar sulmin. Këto pritet të jenë lëvizjet e Sylvinhos për ndeshjen e sotme në Letoni.
Mungesës së kapitenit Berat Gjimshiti, i pezulluar me kartonë, i shtohet edhe lëndimi i Arlind Ajetit.
Stafi i Kombëtares konfirmoi mungesën e mbrojtësit. Kjo do të bëjë që titullarë në repartin difensiv të jenë Ismajli e Kumbulla, me Hysajn dhe Mitajn nga krahët.
Asllani do të ketë përkrah Julian Shehun, që shkëlqeu ndaj Serbisë, ndërsa trajneri ka dilema në fazën sulmuese. Broja konfirmohet djathtas dhe Laçi në regji, ndërsa në krahun e majtë Bajrami është në balotazh me Muçin, që nuk ka gjetur shumë hapësira.
Në majën e sulmit pritet të konfirmohet Manaj, për ta ndihmuar të kalojë goditjen psikologjike të penalltisë së humbur, duke qenë se ai mbetet një lojtar tejet i rëndësishëm i Kombëtares.
Sido që të jetë, alternativat nuk mungojnë pasi Daku, Asani apo Uzuni janë të gjithë në pritje të shansit për të marrë fanellën e titullarit./tvklan
