Një gol i artë për fituesit dhe tronditës për humbësit. Edon Hasani, një shkodran, ishte njeriu që i dha suksesin Kukësit në përballjen e Superligës ndaj Vllaznisë së Shkodrës. Pasi rezistuan për gati 80 minuta, kuqeblutë u ndëshkuan sërish nga një ish-lojtar i tyre dhe tani zbritën në vendin e fundit në renditje. Nuk vlejti loja e fortë në mbrojtje që e vuri në vështirësi Kukësin nënkampion. As pretendimet për penallti, që gjyqtari fare mirë mund ta kishte dhënë.
Në fund, vlejti vetëm rezultati, një fitore që kuksianët e dyshes Hasan Lika-Klodian Duro, e merituan për atë që dhanë në fushën e lojës.
Madje, edhe vendasit e patën një pretendim për 11-metërsh para golit, gjë që u harrua pas fitores.
Me këtë sukses, Kukësi u ngjit në kuotën e 26 pikëve, vetëm një më pak sesa Teuta e vendit të tretë, që luan në Ballsh ndaj Bylisit.
Një tjetër rezultat 1-0 ishte tepër i rëndësishëm.
Tërbuni kaloi Flamurtarin në Pukë, duke u larguar nga fundi i renditjes dhe duke u barazuar në pikë me vlonjatët.
Goli i Enco Malindit në pjesën e dytë bëri që të dyja skuadrat të kenë nga 10 pikë. /abcnews/
