Kryendeshja e javës së ardhshme të Kategorisë Superiore, Partizani-Kukësi, pritet të gjykohet nga një gjyqtar i kampionatit gjerman. Ky është lajmi i bujshëm që raporton “RTSH”-ja, ndonëse pa përmendur emra të përveçëm. Burime pranë Federatës Shqiptare të Futbollit bëjnë me dije se ky është një vendim i marrë tashmë dhe pritet vetëm që të konkretizohet duke sjellë një risi në futbollin tonë dhe duke garantuar në maksimum drejtësinë në 90-minutëshin që do të luhet në “Selman Stërmasi”.
Klubi i Partizanit është ankuar shpesh për gjykimin gjatë këtij sezoni dhe në ditët e fundit ka bërë presion duke kërkuar për gjyqtar të huaj kundër Kukësit, si një mënyrë për të pasur një bilbil të paanshëm në fushë. Për të larguar një herë e mirë dyshimet dhe akuzat, të zakonshme sidomos në fundin e sezonit, FSHF-ja duket gati për t’ua plotësuar dëshirën “Demave të kuq”, edhe pse nuk e ka absolutisht të detyrueshme për ta bërë këtë. Presim se si do të reagojnë drejtuesit e dy klubeve.
