Federata Shqiptare e Futbollit ka nisur punën për ta sjellë në Tiranë finalen e Superkupës së Europës 2019. Pas shpalljes së kandidaturës zyrtare, tani është faza e plotësimit të dokumentacionit për aplikimin në UEFA me synimin që dueli mes fituesit të Champions-it dhe Ligës së Europës të luhet në “Arenën Kombëtare” që pritet të përurohet po atë vit.
Një grup pune brenda FSHF-së, nën koordinimin e sekretarit të përgjithshëm Ilir Shulku, ka nisur plotësimin e dosjes që kalon nëpër disa etapa. Sipas federatës, për përmbushjen e kushteve nevojiten domosdoshmërisht edhe certifikimet e institucioneve të shtetit si Ministria e Brendshme, Ministria e Arsimit dhe Sportit, Bashkia e Tiranës etj.
Dosja pritet të plotësohet deri në fund të majit, për të qenë gati brenda datës 6 qershor, kur komisioni i posaçëm i UEFA-s do të bëjë verifikimin e pikave të kërkuara. Vendimi për finalen e Superkupës Europiane do të merret në shtator të këtij viti./panoramasport
Këto janë kandidaturat:
“Arena Kombëtare”, Tiranë, Shqipëri
Stadiumi i Tuluzës, Tuluzë, Francë
“Florian Albert”, Budapest, Hungari
“Sami Ofer”, Haifa, Izrael
“Astana Arena”, Astana, Kazakistan
“Uindsor Park”, Belfast, Irlanda e Veriut
“Arena Gdansk”, Gdansk, Poloni
“Stadion Norodovi”, Varshavë, Poloni
