Nehat Foljeta dhe Sehar Xhenje janë dënuar me 2.6 vite burg secili për sulmin me thikë që kryen ndaj ish-trajnerit të Vllaznisë Ernest Gjoka në vitin 2018.
Gjykata e Shkallës së Parë në Shkodër ka ndryshuar akuzat për dy të pandehurit duke i dënuar ata për akuzën “Goditje për shkak të detyrës”.
Prokuroria gjatë pretencës kishte kërkuar shpalljen fajtor të dy të pandehurve për akuzat “Vrasje me dashje”. Për Nehat Foljetën organi i akuzës kishte kërkuar 14 vite burg ndërsa për Sehar Xhenjen 12 vite burg.
Ngjarja ka ndodhur në 22 shkurt të vitit 2018. Ish-trajneri i Vllaznisë, Ernest Gjoka ka thënë në dëshminë e tij se pas seancës stërvitore të ekipit, ai po bisedonte jashtë fushës me kapitenin e ekipit kur drejt tyre është afruar një person me kapele dhe e ka goditur me grushte. Pasi Gjoka është vetëmbrojtur personi ka nxjerrë një thikë dhe ka tentuar ta godasë. Trajneri është ka mundur të largohet me një biçikletë por ka humbur ekuilibrin dhe është rrëzuar. Në këtë moment personi i është sulur sërish për ta goditur por Gjoka e ka shmangur dhe e fundit e ka goditur me këmbë në gjoks dhe ai ka humbur ekuilibrin e është rrëzuar.
Në këtë kohë në drejtim të Ernestit është afruar Gilman Lika, me dy persona të tjerë në drejtim të personit që kishte thikën, por ai duke parë këtë situate është ngritur dhe është larguar me vrap në rrugën kryesore.
Treshja e gjyqtarëve Tonin Stërkaj, Arben Çela dhe Sokol Shehu vendosi të shpallë fajtorë dy të pandehurit Nehat Foljeta dhe Sehar Xhenje, me nga 2.6 vite burgim secilin për akuzën e “Goditjes për shkak të detyrës”. Tashmë ky vendim është apeluar nga prokuroria e Shkodrës në gjykatë dhe pritet që në vijim, gjykata të marrë në shqyrtim kërkesën e akuzës për dënimin ose jo me 12 dhe 14 vite burgim dy të pandehurit e mësipërm. /Opinion.al
