Kryetarja e Lëvizjes Socialiste për Integrim, Monika Kryemadhi, sot, gjatë një takimi me strukturat e kësaj partie në qytetin bregdetar të Durrësit, e ka quajtur kryeministrin Rama jo vetëm rrezik kombëtar, por edhe rajonal.
Kryemadhi tha se gjatë fushatës elektorale në qytetin e Durrësit, LSI ka përjetuar terrorin më të madh, pavarësisht kësaj gjendje, kjo forcë politike arriti të ketë rezultatet më të mira në Shqipëri.
Edhe njëherë tjetër, ajo ka sqaruar pozicionin e kësaj partie në opozitë dhe sipas saj kjo lëvizje erdhi, pasi LSI nuk mund të bëhej njësh me krimin.
“Sot Shqipëria drejtohet nga bandat dhe krimi i organizuar. Kemi përballë dy rrugë: të bashkëjetojmë me llumin dhe krimin që po instalon Edi Rama, apo të zgjohemi dhe të sensibilizojmë njerëzit”, tha Kryemadhi.
Sipas saj, Edi Rama vërtetoi shprehjen qeveri e vogël, korrupsion i madh. Ajo tha se 33 zv/ministrat nuk janë socialistë, por përfaqësues të oligarkëve për të mbrojtur interesat e tyre.
Kryemadhi theksoi se edukata politike e këtyre 27 viteve është e bazuar te konflikti, mohimi dhe kundërshtimi i gjithçkaje.
“Ne duam të sjellim risi dhe t’i japim fund kësaj tradite. Opozita jonë e bazuar te alternativa. Ne nuk duam të përfaqësojmë grupe interesi të mafiozëve dhe oligarkëve, por grupe interesi që lidhen vetëm me interesat e drejtpërdrejta të qytetarëve”, tha ajo.
Kryemadhi deklaroi se Edi Rama i sulmon njerëzit e thjeshtë me arsyen e urrjetjes dhe neverisë që ka për ta.
