Të tjera detaje janë zbardhur lidhur me hetimet ndaj sulmit me armë zjarri ndaj Top Channel, ku mbeti i vrarë roja i sigurisë.
Sipas “Shqip”, autoritetet kanë mbledhur prova të rëndësishme që mund të çojnë në identifikimin e personave që qëlluan me armë zjarri ndaj televizionit kombëtar.
Mësohet se autoritetet kanë ushtruar kontrolle të imtësishme në makinën e djegur të gjetur pak kohë pas ngjarjes së rëndë.
Burime për “Shqip”, bëjnë me dije se janë gjetur prova të vlefshme, të cilat janë përcjellë në laboratorin shkencor dhe pritet të nxjerrin profile ADN-je dhe shenjë gishtash të cilat do të verifikohen nga databasat e policisë për të zbuluar nëse mund të ketë një emër për sulmin ndaj Top Medias.
Lidhur me ngjarjen, policia ka shoqëruar disa persona të cilët janë marrën pyetje nesë kanë lidhje apo dijeni për personat që kryen sulmin me armë.
Hetimet po fokusohen edhe te pamjet e kamerave të sigurisë dhe itinerari që kanë ndjekur autorët deri në “Përroin e Agait” ku braktisën mjetin dhe i vunë flakën dhe në brendësi lanë dy kallashnikovët, të cilët po ashtu po ekzaminohen nëse janë përdorur në ngjarje të tjera kriminale.
