Presidenti i Kolumbisë, Gustavo Petro, ka akuzuar një organizatë ndërkombëtare kriminale për tentativën e vrasjes që tronditi vendin dhe la në gjendje kritike një prej konkurrentëve kryesorë për postin e tij presidencial.
Në një postim të gjatë në rrjetet sociale të hënën vonë, lideri i majtë njoftoi masa të shtuar sigurie për drejtuesit e opozitës, në prag të zgjedhjeve presidenciale të vitit të ardhshëm.
Senatori konservator Miguel Uribe Turbay, i cili u qëllua në kokë gjatë një tubimi të fundjavës, vazhdon të jetë në kujdes intensiv.
“Ekzistojnë indikacione shumë të forta, që kanë arritur deri te drejtuesit e lartë të opozitës dhe tek ne, se sulmuesi është pjesë e mafies ndërkombëtare. Vrasësit duan që ne të përplasemi me njëri-tjetrin, të dobësojnë shtetin dhe të avancojnë kontrollin e tyre mbi ekonominë e paligjshme”, tha Presidenti Petro.
Ai akuzoi një rrjet trafikantësh droge që shtrihet nga Dubai, Italia dhe Shqipëria deri në Ekuador, i cili lidhet me grupin kriminal kolumbian Gulf Clan dhe një lider të njohur si Iván Mordisco.
Tentativa për vrasjen e Uribes është shenja më e fundit e situatës në Kolumbi që po përkeqësohet, vetëm pak më shumë se një vit para se Petro të përfundojë mandatin e tij.
Prodhimi i kokainës është në nivele rekord, ndërsa bandat kriminale po zgjerohen në territore të reja, ndërkohë që financat publike po përjetojnë krizën më të rëndë pas pandemisë.
Presidenti Petro nuk ka arritur të kalojë iniciativat kryesore përmes Kongresit dhe gjykatave, dhe menaxhimi i paqëndrueshëm i këtij rasti ka rritur dyshimet për aftësinë e tij për të drejtuar vendin.
Përveç Uribes, Petro njoftoi se masat e sigurisë u janë shtuar edhe drejtuesve të tjerë opozitarë si Maria Fernanda Cabal, Abelardo de la Espriella dhe Vicky Davila.
Shtetasi i mitur i dyshuar për sulmin pritet të paraqitet në gjykatë të martën në mëngjes, ku ai do të akuzohet për tentativë vrasjeje dhe posedim të paligjshëm të armëve. Autoritetet bënë me dije se pistoleta Glock e përdorur në sulm ishte blerë në SHBA në vitin 2020. Duke qenë se sulmuesi është adoleshent, ai do të gjykohet në sistemin e drejtësisë për të miturit, ku dënimi maksimal nëse shpallet fajtor është tetë vite burg. Petro deklaroi se i riu kishte qëndruar rreth parkut ku ndodhi sulmi për 4 orë.
Ai kishte arritur me motorçikletë, kishte komunikuar me disa persona në një furgon dhe kishte përdorur një telefon celular për të kërkuar një pagesë të vogël, që besohet se ia ka dorëzuar dikujt tjetër. Po ashtu, Presidenti tha se djali i Uribes ishte ndjekur për në shkollë, dhe prokuroria po heton nëse vetë senatori ishte ndjekur para sulmit. /tvklan.al
