Nga protesta para Parlamentit, kryetarja e LSI, Monika Kryemadhi është shprehur se është Edi Rama regjisori i sulmit me bojë ndaj deputetit të ri Ralf Gjoni ditën e sotme.
“Regjisori Edi Rama, për të larguar vëmendjen nga çdo gjë e tij, pasi mori betimet e deputetëve të rinj do t’i kthejë dhe në kloun. Po të ishte për të sulmuar, do ta kishim bërë me kohë. Shpresoj që viktimat e radhës të Edi Ramës të mos jenë deputetët e opozitës së re të tij. Më vjen shumë keq për zotin Gjoni. Ata që kanë kryer sulmin të mbajnë përgjegjësi”, tha Monika Kryemadhi.
Pas sulmit, Ralf Gjoni u shpreh se askush nuk e tremb atë. Ndërsa e vlerësoi sulmin si një akt rrugaçërie.
“Nuk kam ardhur këtu për të marrë një rrogë të qelbur. Kam vendosur të futem në Kuvend, kam ardhur të betohem, për të përfaqësuar të gjithë ata shqiptarë të papërfaqësuar nga këta politikanë të papërgjegjshëm. Unë jam shtetas shqiptar dhe i huaj, jam i shkolluar jashtë dhe i punësuar jashtë. Nuk kam ardhur këtu në Kuvend për t’i bërë fresk qeverisë. A më njihni mua apo jo?”, tha Ralf Gjoni, teksa hynte në Kuvend me shenja boje të kuqe në fytyrë./Opinion.al
